Maddiren urtebetetze eguna dugu gaur; zortzi urte betetzera dator neska koxkorra, eta hainbat opari jaso du. Besteak beste, Londresen lanean duen osabaren paketetxoa: ordulari polit-polita dago bertan. Harrezkero, ordea, gauza harrigarriak gertatuko zaizkio Maddiri: dena alderantziz egiten hasiko da eta, gerora, baita esaldiak ere. Era berean, aspaldi ikasiak zituen gauzak egiten ahaztu egingo zaio, eta bera ere txikiagotuz joango da, txupetea eskatuko du...

Idazle batek botila bat aurkitu du Zarauzko hondartzan. Botila barruan paper bat dago eta bertan marrazturik mapa bat. Misteriozko nobela gisa irakur daiteke Lertxundiren liburua, botilaren eta barruan dagoen mezuaren misterioa askatzen saiatuko baita, baina badu beste irakurketa bat ere: literatur gozamenerako sarbide ere bai baita liburua. Maisuki darabiltza Lertxundik tramaren hariak eta nagusiek eta gazteek jakin-minez irakurtzen duten liburua da Lehorreko koadernoa.

Postetxetik pakete bat jasotzera pasatzeko agindua jaso du Madame Kontxexik. Joan da eta kutxa tzar handi bat eman diote. Eta ohar bat: Madame Kontxexiri agur eta goraintzi: Gordeko egun pare batez edo, kutxa inork ireki gabe? Irekiko bazenu, zuretzat kalte. Infernuko zuloraino izango duzu segika eta segika nire aiherkunde saminena. Irekitzen ez baduzu, berriz, erregalitxo bat izango zenuke. Zer moduz zure izenera jarriko nukeen harategi majo bat? Edo nahiago zenuke, agian, jatetxe bat? Izango duzu nire berririk, zaude lasai. Sinaduraren ordez, V.S. laburdurak...

Ipuin antologia honen arduraduna Iñaki Aldekoa izan da. Berak aukeratu ditu euskal ipuingintza modernoaren barrutian alerik umoenak iruditu zaizkionak. Antologiagileak ez du ipuin biltze soil bat egin, liburua bere osotasunean pentsatu baizik. Euskal ipuingintzaren maisulanak. Zortzi ipuinlari eta hamalau ipuin biltzen dira liburuan, I. Aldekoaren hitzaurre jakingarri batekin.

Behin Fokker hegazkin zaharrean, azafatak besotik heldu eta hegazkinaren barrura eraman zuen Bixentiko, gainerantzeko bidaiariak atzean utzi ondoren: -Nahi duzun tokia hautatu, Caracolillo, ongi etorria Fokker-era. Bixentikok anteojo beltzak sudur puntaraino jaitsi eta inguruak miatuz: -Segurua al da hegazkin hau? -Segurua? Bigarren gerrate mundialetik honantza ez du istripu bakar bat ere izan. Hegazkinaren zehaztasun tekniko ugari eman zizkion azafatak Bixentikori. Eta hegazkinaren kalitatea indartzeko asmoz: -Fokker-ik ez zeukalako galdu omen zuen gerra Hitler-ek.

Biharamunean, Madame Maripetral ikastetxera iritsi zenean, Dexpaxiok, gelako neska-mutil guztiez inguraturik, egunkaria pasatu zion. Egunkaria zabaldu, zuzendariak eta Madame Kontxexiren argazkia ikusi zuen lehendabiziko orrialdean. Antiojoak jantzi eta irakurtzen hasi zen:Atzo arratsaldean Madame Kontxexi, Aristides Mark Aide ikastetxeko andereñoak, Retrevier arrazako Kaxkajoren bila ari zela, lapur talde arriskutsu bat atxilotzea lortu zuen balentia apartaz, ausardia paregabeaz, adore txit prestuaz, kemen kementsuaz....